Rev 8 | PMA | STEP | Navong kei koa suval sili sipsip kum vas siil ekor koa oulu (7) en keil, tounah vasi en out nesa aro raeng avong havivi.

Revelation of John 8

Kei koa Suval Sili Sipsip Kum Vas Siil koa Oulu (7) en Keil

1 Navong kei koa suval sili sipsip kum vas siil ekor koa oulu (7) en keil, tounah vasi en out nesa aro raeng avong havivi. 2 Evus, nales vativar keil onen angelo keil koa avi oulu (7) koa amulomal lises en meten Ahi. Asani min keil amaru oulu (7).

3 Angelo tateisav tamun mai mulomal vesesal ven ahor ten sanien. Kei kur more pesin koa amumoni en gol koa amunit tounah keil koa vite tahos ien. Asan ouai houlu koa vite tahos mini vaniti vatal hisien keil onen meatin votut keil onen Ahi. Angelo enek kuri valing revi en ahor ten sanien koa amumoni en gol koa mul vesesal en vulin ten keihoen onen Ahi. 4 Kei vou lat pesin en nan Ahi, ka tupas teni vina nesa ral min hisien onen meatin votut keil onen Ahi. 5 Evus, angelo kur pesin ka sieni en meneihang koa kuri ran ahor ten sanien. Evus, rang lini vita en out netan. Koanik sakin voulul mut ka muroh keih, ahil vilahil, ka alu mulu keih.

Vativar Oulu Onen Angelo Keil Asak Mesen Keil Avouh Amaru One keke Mahien Keil Hekur Out

6 Evus, vativar oulu (7) onen angelo keil asak mesen keil avouh amaru one.

7 Navong vativar koa tai en keil muh amaru onen, amutah merali laklas keil ka ahang koa ara mul ien avita en out netan. Ahang enek kan lin oumunai vasi keil koa amoul en out netan, ka kan lin vatiai keil en hatte koa heite tai en atan keil en out netan. Ka hatte koa elu eni mules.

8 Evus, vativar koa elu (2) en keil muh amaru onen. Navong muhi, tounah tai koa alesi suval mari hou tai koa ahang mul ien, asoni va en atas. Koanek sakin hatte koa tai en atas keil mai vi ara, ka hatte koa elu eni mules. 9 Koanek sakin hatte koa tai en tounah keil koa amoul en atas umatmat, ka hatte koa elu en keil amules. Ka hatte koa tai en sip keil emun koa amul ien avi soksokeite, ka hatte koa elu en keil amules.

10 Evus, vativar koa etel (3) en keil muh amaru onen. Navong muhi, mari hitu tai koa ahang mul vilhili ien mot ran teilang ka bon hatte koa tai en oaisal ka vulioai keil, ka hatte koa elu en keil amules. 11 Isen hitu enek vi 'Kun' ka sakin hati oai keil enek viles mai kun, ka meatin houlu umatmat veni amun oai takun enek.

12 Evus, vativar koa ehat (4) en keil muh amaru onen. Navong muhi, tounah tai mai bon hatte koa tai en meteiai, en avati ka en hitu keil emun. Ka hatte koa elu en keil mules. Sakini keil arritintei vasuval mulamu. En hatte koa tai en avong vasi, meneai mai vi malikelik, ka hatte koa elu eni meneai mules. Ka hatte koa tai en vongien vasi, maim tovuol, ka hatte koa elu eni maim mules.

13 Evus, naseipat ka nales veivakum tai mul muka en mesaiuai. Nalongen ren koa viso keih vit, “!Aue li! !Aue li! !Oh aue li! !Hetisa vis hetisa mok min koakeil amul en out netan navong vativar keitel koa telmules telhouh amaru oneatel!”